މާލެ ސިޓީ އަށް ގެންނަ ތަރައްގީގައި ވިލިމާލެ ބާކީއެއް ނުވާނެ: ރައީސް

މާލެ ސިޓީ އަށް ގެންނަ ތަރައްގީގައި ވިލިމާލެ ބާކީއެއް ނުވާނެ ކަމަށް ރައީސުލްޖުމްހޫރިއްޔާ ޑރ. މުޢިއްޒު ވިދާޅުވެއްޖެ އެވެ. އެމަނިކުފާނު މިހެން ވިދާޅުވީ މިލިމާލެ އަށް ވަޑައިގެން އެ އަވަށުގައި ދިރިއުޅުއްވާ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުންނެވެ.
ރައީސް ވިދާޅުވީ ވިލިމާލެއަށް އިހުމާލު ކޮށްލެވިފައި އޮންނަން ޖެހޭނެ ކަމަކަށް ގަބޫލުފުލު ނުކުރައްވާ ކަމަށާއި، ސަރުކާރު ތެރެއިން މި އަވަށަށް ޔަގީނުންވެސް މާ ފުރިހަމައަށް ކަންކަން ކޮށްދެއްވާނެ ކަމަށެވެ.
ރައީސް ވިދާޅުވީ، ވިލިމާލެ ރައްޔިތުންނަށް ވެވަޑައިގެންނެވި ވައުދުތައް ފުރިހަމައަށް ހަނދާން އެބަ ހުރި ކަަމަށެވެ. އޭގެ ތެރެއިން ބައެއް ކަންކަން ފުރިހަމަ ކުރެވެވި، ބައެއް ކަންކަން ހިނގަމުންދާ ކަމަށް ރައީސް ވިދާޅުވިއެވެ.
މީގެ ތެރޭގައި ހިމެނޭ އެންމެ ބޮޑު އަދި އެންމެ މުހިންމު މަޝްރޫއުތަކުގެ ތެރޭގައި ހިމެނެނީ ވިލިމާލޭގައި 100 އެނދުގެ ހޮސްޕިޓަލުގެާ އިމާރާތާއި، މަގު ހެދުމުގެ މަޝްރޫއުއެވެ. މި ދެ މަޝްރޫއުވެސް ޗައިނާ ކުންފުންޏަކާއި ހަވާލުކޮށްފައިވާއިރު، ރައީސް ވިދާޅުވީ، އެ ހޮސްޕިޓަލުގެ ހުރިހާ ކަމެއް ހަމަޖެހި، ފަންޑިންގެ ހުރިހާ ކަމެއް ހަމަޖެހިފައިވާ ކަމަށާއި، އެކަމުގެ ހުރިހާ މަރުހަލާތަކެއް ރަނގަޅަށް ހިނގާ ކަމަށެވެ.
އަދި މުޅި މާލެ ސިޓީގެ މަގުތައް ހެދުމުގެ މަޝްރޫއުގެ ތެރެއިން، ވިލިމާލެ މަގުތައް ހަދަން ޗައިނާ ސަރުކާރުން ފަންޑު ހަމަޖެހި، އެކަންވެސް އެ އޮންނަ މަރުހަލާގެ ތެރެއިން ކުރިއަށް ދާ ކަމަށް ވިދާޅުވިއެވެ.