މިދިޔަ ދެ އަހަރަކީ ޒަކާތުގެ ގޮތުގައި އެންމެ ގިނަ ފައިސާ ލިބުނު ދެ އަހަރު ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ. މި ދެ އަހަރު ދައުލަތަށް ޒަކާތުގެ ގޮތުގައި 100 މިލިއަނަށް ވުރެ ގިނަ ރުފިޔާ ވަނީ ލިބިފައެވެ.
ރާއްޖޭގައި ފުރަތަމަ ފަހަރަށް ފާސްކުރި ޒަކާތުގެ ގާނޫނު އިއްޔެ ރައީސް ތަސްދީގު ކުރެއްވުމާ ގުޅިގެން، އަންނަ މަހުގެ 1 ވަނަ ދުވަހުން ފެށިގެން އެ ގާނޫނަށް އަމަލުކުރަން ފަށާނެއެވެ. މިކަމާ ބެހޭ ގޮތުން ޑރ. ޝަހީމް ވިދާޅުވީ ޒަކާތަށް ގާނޫނެއް ހަދައި، ލީގަލައިޒް ކުރެވުމަކީ ދިވެހިންނަށް ލިބުނު ވަރަށް ބޮޑު އުފަލެއް ކަމަށެވެ. ޒަކާތުގެ ނިޒާމު ހަރުދަނާކުރުމަށް މި ގާނޫނަކީ މުހިންމު ބަދަލެއް ކަމަށް އޭނާ ފާހަގަކުރެއްވިއެވެ.
ޒަކާތާ ބެހޭ ގާނޫނުގައިވާ ގޮތުން، ދިވެއްސެއްގެ މުދާ ރާއްޖޭގައި ނުވަތަ ރާއްޖެއިން ބޭރުގައި ހުރި ނަމަވެސް، އަދި ރާއްޖޭގެ އިތުރުން ރާއްޖޭން ބޭރުގައި ވަޒަންވެރި ވެގެން އުޅުނަސް ރާއްޖޭގައި މުދާ ހުރި ނަމަ ޒަކާތް ދައްކަން ޖެހޭނެއެވެ. މިއީ ޒަކާތުގެ ދާއިރާ ފުޅާކޮށް، އެކަމަށް ލިބޭ އާމްދަނީ އިތުރުކުރުމަށް އެޅޭނެ މުހިންމު ފިޔަވަޅެކެވެ.
ޒަކާތުގެ ނިޒާމު ހިންގާ ބެލެހެއްޓުމުގައި މިނިސްޓަރަށާއި ޒަކާތު ހައުސްއަށް ލަފާދީ، އަދި އެ ނިޒާމު ހިންގުން ވިލަރެސްކުރުމަށް އެ ގާނޫނަށް އަމަލުކުރަން ފަށާތާ ދެ މަސް ދުވަހުގެ ތެރޭގައި ޒަކާތު ކައުންސިލުގެ ނަމުގައި ކައުންސިލެއް ރައީސް އުފައްދަވަން ޖެހެއެވެ. މި ކައުންސިލްގެ މަސައްކަތަކީ ޒަކާތުގެ ކަންކަން ހަރުދަނާ އުސޫލެއްގެ ދަށުން ކުރިއަށް ގެންދިއުމަށް އެހީތެރިވުމެވެ. "ޒަކާތުގެ ގާނޫނަކީ ދިވެހިރާއްޖޭގެ ރައްޔިތުންނަށް ލިބުނު ވަރަށް ބޮޑު އުފަލެއް،" ޑރ. ޝަހީމް ވިދާޅުވިއެވެ.
