ހިޔާ ފުލެޓް ލިބުނު ކަމުގެ ލިޔުން ލިބި، ނަމަވެސް ކުރީގެ ސަރުކާރުން ނުލިބޭ ކަމަށް ނިންމި ފަރާތްތަކަށް އެމަނިކުފާނުގެ ސަރުކާރުން ވައުދާ އެއްގޮތަށް ފުލެޓުތައް ދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ހެންވޭރު ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނު ރިޔާސީ އިންތިޚާބުގައި ވައުދުވެފައިވަނީ، އެ ފަރާތްތަކަށް އެ ފުލެޓުތައް ހަވާލުކުރައްވާނީ އެމަނިކުފާނުގެ ސަރުކާރުގައި ހިންގޭ އެންމެ ފުރަތަމަ ސޯޝަލް ހައުސިންގް ސްކީމްގެ ތެރެއިން ކަމަށެވެ. އެމަނިކުފާނު ވިދާޅުވީ އެކަން އޮތީ އެގޮތަށް ކަމަށާއި، ކުރިއަށް އޮތް ހައުސިންގް މަޝްރޫޢުތަކުން ފުލެޓު ދޫކުރުމުގައި މި ފަރާތްތަކަށް ޚާއްސަ ކެޓަގަރީއެއް އޮންނާނެ ކަމަށެވެ.
ރައީސް އިތުރަށް ވިދާޅުވީ، މި ފުލެޓުތައް ހޯދުމަށްޓަކައި އެއްވެސް އާ ޝަރުޠެއް އެ ފަރާތްތަކަށް ނޯންނާނެ ކަމަށާއި، ކުރިން ކެންސަލް ކުރެވުނު ފަރާތްތަކަށް ކަނޑައެޅިފައިވާ އަދަދަށް ފުލެޓު ދޫކުރެވޭނެ ކަމަށެވެ.
މީގެ ތެރޭގައި އަލަތު ކައިވެނީގެ ކެޓަގަރީތަކުގެ އިތުރުން އެހެން ކެޓަގަރީތަކުން ފުލެޓު ލިބިފައިވާ ފަރާތްތައް ވެސް ހިމެނޭ ކަމަށް ރައީސް ވިދާޅުވިއެވެ. އަދި މި ސަރުކާރުން ހިންގާ ހައުސިންގް ސްކީމްތަކުގެ ތެރެއިން "ފުލެޓު ލިޔުން ހަވާލުކުރެވުނު ނަމަވެސް ފުލެޓު ނުލިބުނު ފަރާތްތަކަށް" ޚާއްސަ ކެޓަގަރީއެއްގެ ދަށުން އެ ފުލެޓުތައް ލިބޭނެ ކަމަށް އެމަނިކުފާނު ވިދާޅުވި އެވެ.
ސަރުކާރުން އެންމެ ފުރަތަމަ ފަށާނީ ބީއެމްއެލްގެ ފައިނޭންސްގެ ދަށުން 3،000 ހައުސިންގް ޔުނިޓުގެ މަޝްރޫޢުއެވެ. އޭގެ ފަހުން އިންޑިއާގެ ލައިން އޮފް ކްރެޑިޓްގެ ދަށުން 4،000 ހައުސިންގް ޔުނިޓުގެ މަޝްރޫޢު ފެށޭނެއެވެ. ރައީސް ވިދާޅުވީ، މި ސަރުކާރު ނިމޭއިރު ޖުމްލަ 7،500 ހައުސިންގް ޔުނިޓު ޢިމާރާތް ކުރެވިގެންދާނެ ކަމަށެވެ.
